פֿון דער רעדקאָלעגיעליטעראַטורייִדישפּאָעזיע מוזיק דערצײלונגעןפֿילם און טעאַטער

ייִדישלאַנד

װעלװל טשערנין




וועלוול טשערנין איז געבוירן געוואָרן אין 1958 אין מאָסקווע. זיך געלערנט אויפֿן היסטאָרישן פֿאַקולטעט פֿונעם מאָסקווער אוניווערסיטעט און אין ייִדיש־גרופּע בײַם מאָסקווער ליטעראַטור־אינסטיטוט. 4 יאָר געאַרבעט אין רעדאַקציע פֿונעם זשורנאַל "סאָוועטיש היימלאַנד". אויף די שפּאַלטן פֿון דעם זשורנאַל זײַנען אין אָנהייב 80ער יאָרן זיך באַוויזן זײַנע ערשטע לידער. ווי אַ בײַלאַגע צו "סאָוועטיש היימלאַנד" איז אין 1986 דערשינען זײַן ביכל "דיאַלאָגן וועגן דער ייִדישער קולטור אין פֿססר". דערנאָך איז ער געווען אַ מאָסקווער קאָרעספּאָנדענט פֿון דער צײַטונג "ביראָבידזשאַנער שטערן" און אַ ליטעראַטור־קאָנסולטאַנט אין טעאַטראַלע קאָלעקטיוון. צווישן אַנדערס אָנטיילגענומען אין שטעלונגען פֿון שלום־עליכמס פּיעסע "שווער צו זײַן אַ ייִד" (דער קיִעווער טעאַטער "מזל־טובֿ"), פֿון "מסעות בנימין השלישי" לויט מענדעלע מוכר־ספֿרימען (דער מאָסקווער טעאַטער "ערמיטאַזש") און פֿונעם מוזיקאַלן ספּעקטאַקל "אַ ייִד פֿון אַ גאַנץ יאָר" (די ביראָבידזשאַנער שאָו־גרופּע "פֿריילעכס").

עולה געווען אין 1990. געאַרבעט אין רוסיש־שפּראַכיקער פּרעסע פֿון ישׂראל. געשריבן פּאָעטישע טעקסטן פֿאַרן תּל־אָבֿיבֿער טעאַטער "ייִדישפּיל". זיך געלערנט אויף ייִדיש־קאַטעדרע פֿונעם בר־אילן־אוניווערסיטעט און באַקומען אין 1999 אַ דאָקטאָראַט. געווען אַ לעקטאָר פֿאַר ייִדיש און ייִדישער ליטעראַטור און אוניווערסיטעטן פֿון ישׂראל, רוסלאַנד, ליטע און אוקראַינע. אַרויסגעגעבן 7 לידער־זאַמלונגען אויף ייִדיש און 1 – אויף העברעיִש. עס זײַנען דערשינען אין אַ בוך־פֿאָרם אויך איבערזעצונגען פֿון זײַנע לידער אין רוסיש און אין אוקראַיִניש. אַרויסגעגעבן אַ זאַמלונג עסעען "נאָענט צו מיר". איבערגעזעצט אין רוסיש אַ גאַנצע ריי פּראָזע־ווערק און פּיעסן פֿון אבֿרהם גאָלדפֿאַדען, שלום־עליכם, זלמן שניאור, ישׂראל־יהושע זינגער, חיים גראַדע, יצחק באַשעוויס־זינגער, מיכאל פֿעלזענבאַום אא. פֿאַרעפֿנטלעכט פֿילצאָליקע פֿאָרשונגס־אַרטיקלען וועגן ייִדישער ליטעראַטור. אָנטיילגענומען אינעם צונויפֿשטעלן אַטאָלאָגיעס פֿון דער ייִדישער דיכטונג אין איבערזעצונגען אויף אוקראַיִניש און העברעיִש. גיט אַרויס צוזאַמען מיט מיכאל פֿעלזענבאַומען די ביכער־סעריע "ביבליאָטעק פֿון דער הײַנטצײַטיקער ייִדישער ליטעראַטור". וווינט אין כפֿר־אלדד, ישׂראל.